خلال حلوله ضيفاً على برنامج “من الآخر” المذاع عبر قناة ONE، كشف الفنان مصطفى كامل نقيب المهن الموسيقية، عن أسباب رفضه التعاون مع نجوم الغناء ومن بينهم عمرو دياب ومحمد حماقي وحمادة هلال وغيرهم، وذلك من خلال كتابة كلمات أغان لهم خلال الفترة الحالية، كما كشف عن رايه في هاني شاكر ومحمد منير وأسباب خلافه مع محمد فؤاد، ولماذا لم يتدخل في خلاف علي الحجار ومدحت صالح.
وقال كامل: “محمد حماقي كان هنا بنشوف هنعمل إيه وعمرو دياب قعدنا واختارنا أغنيتين وعايزين نشتغل، ونصر محروس وحمادة هلال ومحمد فؤاد وإيهاب توفيق بيكلموني على طول أنا اللي معنديش نفس أكتب أغاني”.
وأضاف: “أنا بعمل تحديث لنفسي طول الوقت، جيل الشعراء افتقدوا حاجة أنا بعيشها دلوقتي يعني أنا في حفلاتي بحتك بالجمهور”.
وعن دوره كنقيب في التدخل بالمحتوى الذي يقدمه في الأغاني، قال: “النقابات لما اتعملت كان ليها هدف وغرض معين هو الاعتناء بأبناء المهنة على ظروف حياتهم، إنت مش رقيب عليهم إنت عندك حاجة اسمها الإدارة العامة للرقابة على المصنفات تابعة لوزارة الثقافة للدولة أنا مليش رقابة على ده قانونًا معنديش ده.
وعن عدم تدخله في خلاف الفنانين علي الحجار ومدحت صالح، رد قائلاً: “أنا هقول لمين متعملش مش هينفع أضعف نفسي كرقابة وأقل من قيمة الرقابة ومن قيمة نفسي، وأنا أصلاً مش مقتنع إني أتدخل في الخلاف ده، لأنه جهات الدولة هي اللي بتتحكم في ده وفي حاجة اسمها المحكمة الاقتصادية”.
وعن رأيه في الفنان هاني شاكر، قال مصطفى كامل: “مشوار عمر صفحة من أهم صفحات مشوار مصطفى كامل لو افترضنا إن أنا كتاب صغير أو كشكول، هاني شاكر من أهم صفحاته، وعمرو دياب هو الوحيد اللي عارف هو عايز إيه”.
وتابع: “محمد منير العقل الجميل اللي كل ما أقعد معاه أحس إن الفنان لازم يكون مثقف، ومحمد فؤاد أنتيم كل حاجة سواء النجاح أو الرخامة أكتر شخص رخمنا على بعض في الحياة، مرة اختلافنا فترة وطلع هو مضايق، وأنا مضايق في مكتبي وفي حد كل ما ييجي مكتبي يقولي خلي بالك فؤاد بيعمل ألبوم هيكسر الدنيا فأنا أضايق إنه هيعمل حاجة تكسر الدنيا وإحنا كنا بنعاند في بعض بالوقت ده”.
وأضاف مصطفى كامل: “أنا كنت في فترة خلافي مع محمد فؤاد بقدم مطرب جديد أنا مقتنع بيه اسمه بهاء سلطان كنت قاعد بديله حياتي كلها وعايز أنجح بيه”.
وعن رأيه في مطرب الراب ويجز، أوضح: “أنا مش في دماغي الراب مش قادر أحبه مش قادر أفهمه بس مش ويجز نفسه أنا مش عارف أفهم علشان أحب الراب بس الواقع بيقول إن ويجز راجل سوبر ستار”.