أثار تسريب لائحة أجور الفنانين مؤخرا حالة من الجدل الفني الواسع، وفي الوقت الذي لم تتأكد صحتها تناولها بعض الفنانين بشكل ساخر، والبعض الآخر راح لتفسيرات مختلفة، نرصد خلال التقرير التالي ردود أفعال بعض صناع الفن على اللائحة المزعومة عبر حساباتهم على موقع التواصل الاجتماعي”فيس بوك:
بدأ الأمر منذ أيام قليلة، حينما أعلن المنتج جمال العدل أحد المؤسسين لاتحاد المنتجين في مصر، أن الأيام القادمة ستشهد اجتماعات مكثفة مع النقابات الفنية؛ لمناقشة لائحة الأجور الجديدة التي وضعها الاتحاد.
وأوضح جمال العدل، أن الهدف من وضع لائحة الأجور هو عمل توازن وضبط الأسعار، في ظل مغالاة عدد كبير من العاملين بالفن في أجورهم، ومضاعفته بشكل غير منطقي وواقعي، رغم علم الجميع بالأزمات العديدة التي يواجهها المنتجون، والأمر الذي انعكس على كم الإنتاج الذي انخفض بشكل كبير، وكان لهذا الأمر تداعيات كثيرة أهمها معاناة عدد كبير من العاملين بالفن من البطالة.
وكانت شعبة الصوت بنقابة المهن السينمائية مؤخرا، أصدرت بيانا لرفض تطبيق لائحة الأجور الجديدة قبل مناقشتها مع أصحاب الشأن، خاصة وأن اللائحة تتضمن تخفيض أجور بعض أعضاء الشعبة.
وبعد تسريب لائحة لم يتأكد صحتها لأجور الفنانين وبها تصنيفهم لمستويات وتجاهل لآخريين علقت الفنانة نشوى مصطفى وقالت:”وفى ظل الأزمة ومعاناة الناس بتتسرب لائحة لأجور المشتركين فى صناعة الفن مين الشرير اللي سربها إحنا ناقصين الناس تسب وتسخط وعلى فكرة بقى حيكون ليهم حق الأرقام المتسربة لو قراها دكتور جامعة مش حاقول عامل ولا موظف حيكفر بالحياة مين اللي عمل كده أظن والعلم عند الله إنها مزيفة بس اتنشرت لاثارة الناس وتحفيزهم ضد المنظومة الفنية وضد البلد”.
بينما جاء تعليق الكاتبة إنجي علاء ساخرا حيث استعانت بالإيفيه الشهير للفنان عادل إمام “أنا اسمي مكتوب” وكتبت:”معلش يعني بس الإفيه حكم (بوست خاص بفئة معينة عارفة نفسها كويس)”.
والمؤلف محمد أمين راضي حرص على تحليل قائمة الأجور المسربة وقال عبر “فيس بوك”:”في ناس كانت متخيلة اني هتضايق من تصنيفي ك a مش ك a +في جدول تصنيف الأجور في حقيقة الأمر أنا شايف إن الترتيب ده كأجر ليا في اللحظة دي مناسب جدا بل أنا ممكن أكون في درجة أقل كمان من حيث التصنيف دة ومحطوط في الدرجة دي كحفظ ماء وجه مع العلم اني أصلا ما اشتغلتش مع المتحدة ولا مرة”.
وفي منشور آخر قال محمد أمين:”قرأت لايحة الأجور و فيما يخص النجوم و المخرجين و المؤلفين بعيد عن موضوع التقسيم لفئات اللي عارف إن في ناس هتضايق منه بصراحة شايف الأجور غير مجحفة بس في نفس الوقت تفصيلة إن أجور ال تلات أقسام دول بس غير مجحفة هو أمر ثعباني جدا و بيستخدم طريقة فرق تسد ليه لأن فعلا في اجحاف رهيب لأجور باقي الأقسام ما عادا قسم التصوير طبعا فبالتالي بيتم تحييد التلات أقسام دول ( التمثيل – الإخراج – التأليف ) من إنهم يتضامنوا أو يتكلموا أو يدافعوا عن أجور الأقسام التانية من باب أنت مالك ما أنت ما حدش جه عليك، وأجرك تمام، و يتحرقوا الباقين، احننا مننا لله”.
وعلق المنتج جمال العدل على منشور محمد أمين وقال:”أٌكلت يوم أٌكل الثور الأبيض”.
وفي منشور ثالث قال محمد أمين راضي:”حاجة من الحاجات السخيفة برضه اللي هتترتب على تسريب اللايحة دي أن الجمهور هيشوف الأرقام دي في ظل أكبر ضائقة اقتصادية بيمر بيها المجتمع من سنين السنين و هيتعامل معانا على أساس إننا بطرنين و أسطوانة نوفر الفلوس دي بدل ما بنصرفها على المسلسلات طالما هي مش عجباهم كمان الأجور !”.
من جانبه علق الإعلامي محمد الدسوقي رشدي وقال:”لائحة أجور للعاملين في صناعة الدراما كويس إن أهل الصنعة بتاعة الإبداع والفن والإبتكار والحرية والبراح قرروا خلاص إنهم يدخلوا كادر التصنيف المالي وعالم الموظفين بشرة خير بس سؤال لو مؤلف أو مخرج أو ممثل من اللي تصنيفه فئة أولي عشان هو شاطر قدم عمل وحش وفاشل في سنة هتنزلوا التصنيف بتاعه طيب ايه هي المعايير ،يعني لو حد بيقدم عملين في السنة ، وحد تاني بيشتغل كل ٤ سنين هتتحسب ازاي ؟! طيب الحسبة هتبقي ايرادات واعلانات ومشاهدات ولا مين تريند سوشيال ميديا ؟
أنت متخيل تبقي مبدع وفنان وبتشتغل وفي دماغك لازم تعمل فرقعة نجاح من اللي بتعمل تريندات الجمهور هتلاقي منين وقت تفكر في حاجة حلوة مؤمن بيها ؟! “.
وكان للناقدة الفنية فايزة هنداوي قولا في هذا الأمر وقالت:”التفاوت بين أجور الأقسام المختلفة في لائحة الأجور اللي عاملاها المتحدة مش لصالح المهنة خالص زي ما هما متخيليين الشعور بالظلم عمره ما يخلي حد يبدع علشان كدة أنا سعيدة بتحركات شعبة الصوت واتمني يكملوا لحد ما ياخدوا حقهم ويا ريت القائمين علي الإنتاج يفهموا أن المشكلة مش في الأجور خالص ولا هيحلها التصنيف المستفز اللي عاملينه المشكلة في أمور تانية أهم واعقد اتكلمنا عنها كتير أهمها الحرية ثم الحرية ثم الحرية في تناول أفكار مختلفة بعيدا عن الأفكار المعلبة اللي بندور حواليها بقي لنا سنين”.
أما المخرج أمين شاكر فأكد أنه يؤيد فكرة وجود لائحة أجور وقال:”أنا من المؤيدين جدا للائحة الأجور ودا المتبع في معظم النقابات الفنية بالعالم، وعن تجربة شخصية في التسعينات وبداية الألفية الجديدة أما كنت بصور في لبنان وسوريا وتركيا وتايلاند واليونان وبنعمل مقابلات كاستنج كان الممثلين والفنيين بيقدموا لنا كارنيهات نقاباتهم ومكتوب فيها الفئة ودا شيء مريح وبيوضح الحد الأدنى والحد الأقصى للأجور ،بس اللي عايزين نعرفوا فقط من هو الشخص أو الجهة أو المعيار اللي بيحدد إن المؤلف أو المخرج أو مدير التصوير أو مهندس الديكور أو مهندس الصوت الفلاني يبقي فئة Aاو Bاو C، لان اما قرات أسماء الزملاء من المخرجين المستثنين من مستوي الفئات بدون ذكر الأسماء وهما سبعة أسماء فقط ممكن نقول عليهم( +A) سوبر ستار في مجالهم، السؤال الأول لو الأساتذة شريف عرفة أو عمرو عرفة أو مروان حامد أو ساندرا نشات أو هالة خليل أو رامي إمام أو ملوك الدراما محمد فاضل ومجدي أو عميرة وجمال عبد الحميد وأحمد صقر وهؤلاء أسمائهم غير مدرجة حيتعاملوا على انهي فئة، السؤال الثاني هل المعيار هو تاريخ المخرج من سابقة أعماله أو الإيرادات مع إن الدراما التليفزيونية ليس لها علاقة بإيرادات الشباك طب هل بالرعاة والإعلانات أو نسبة المشاهدين ودا للأسف مرتبطة بالممثل النجم وليس المخرج في وقتنا الحالي”.
وتابع أمين شاكر:” أما بحصول المخرج على جوائز واللي معيارها إيه بالظبط السن والشكل قصير أو طويل أبيض أو أسود أو بالسكن عايش في منطقة راقية أو شعبية متزوج أو أعزب عنده أولاد أم لا عايزين فقط توضيح من المسؤولين على هذا الموضوع اللي شاغل معظم العاملين بالوسط الفني للدراما الآن وفي النهاية أنا شخصيا لا يهمني مستوى الفئات على قد ما يهمني التوزيع العادل في الشغل لأن الأجور دا رزق من الله ليس لنا يد فيها”.
